7-anyos sapol sa parak, patay

CAMP CRAME – Isang 7-anyos na batang babae ang nasawi habang nasugatan ang isang negosyanteng ginang nang walang habas na mamaril ang isang abusadong pulis kamakalawa sa Laguna.

Kinilala ang bata na si Tricha Mae Bagnes habang ang sugatan ay si Marcela Torres, 31-anyos.

Nagsasagawa na ng manhunt operation ang awtoridad laban sa kanilang kabaro na si PO2 Erick Kaligayahan na nakatalaga sa San Pablo City Police Station.

Sa ulat na nakarating sa PNP-HQ, dakong alas-5:45 ng hapon nang maganap ang insidente sa Brgy. Babybayan, Los Baños, nasabing lalawigan.

Nabatid sa kasalukuyan umanong nangongolekta si Torres sa ilang negosyante nang mapadaan ang suspek sakay ng isang motorsiklo kasama ang dalawang kaibigan at walang habas na namaril.

Minalas namang tamaan ng punglo ang batang biktima na naglalaro sa kabilang kalye. (Angie dela Cruz)