1 dedo sa taga, 2 pa grabe

CAMP PANTALEON GARCIA, Cavite – Hindi na umabot pa ng buhay sa pagamutan ang isang mister habang nasa malubhang kalagayan naman ang dalawang pang kaibigan nito makaraang pagtatagain ng isang grupo ng mga kalalakihan kamakalawa ng gabi sa Brgy. Sta. Teresa, Alfonso, Cavite.

Ang nasawi ay nakilalang si Edgardo del Mundo, 39-anyos, may asawa habang kritikal naman sa pagamutan sina Marlon Hererra 33; at Manolito Mojica, 49, magsasaka at pawang mga residente ng Brgy. Sta Teresa ng bayang ito.

Mabilis namang nakatakas ang mga suspek na nakilalang sina Willie Ligaya alyas Payi; Raymundo Ligaya at Reynaldo Salazar, pawang mga nasa hustong gulang at nakatira din sa nasabing lugar.

Batay sa imbestigasyon ni PO3 Malimban, may hawak ng kaso dakong alas-11 ng gabi ng bigla na lamang sugurin ng mga suspek na pawang mga armado ng itak ang mga biktima na kanilang pinagtataga saka mabilis na nagsitakas.

Inaalam pa ng pulisya ang motibo ng krimen. (Cristina G. Timbang)