Namagitan sa away, dinedo

CAMP PANTALEON GARCIA, Cavite – Pinagtulungang saksakin hanggang sa mapatay ang isang mister ng mag-ama matapos na mamagitan ang biktima sa away ng kanyang kaibigan at huli sa Barangay Molino 2 sa bayan ng Bacoor, Cavite kamakalawa ng gabi. Napuruhan sa tagiliran ang biktimang si Juanito Abadejos na may alyas na Boy Negro ng Camia Street, Green Valley Subdivision ng nabanggit na barangay. Nadakip naman ang batang suspek na si Danilo Ortega Jr., samantalang, tugis ng pulisya ang ama nitong si Danilo Sr. Lumitaw sa pagsisiyasat ni PO2 Joel Malinao, bago maganap ang krimen ay namataan ng biktima na pinagtutulungang gulpihin ang kaibigan nito, kaya tinangkang awatin. Subalit pinagbalingan ng galit ang biktima dahil sa pakikialam kaya napaslang. (Cristina Timbang)