Panaderya binomba

CAMP AGUINALDO — Niyanig ng malakas na pagsabog ang isang panaderya sa bayan ng Kabacan, North Cotabato matapos na taniman ng bomba ng mga terorista na pinaniniwalaang kasapi ng Jemaah Islamiyah, kamakalawa ng gabi.

Ayon kay Army’s Infantry Division chief Major General Agustin Dema-ala, naitala ang pagsabog bandang alas-9:30 ng gabi sa harapan ng panaderya na pag-aari ni Crisostomo Baluyot sa kahabaan ng Roxas Street na sakop ng Kabacan.

Wala namang iniulat na nasawi o nasugatan maliban sa nawasak ang harapan ng nasabing bakeshop.

Pinaniniwalaan naman ng militar na test mission lamang ang naganap na insidente at posibleng may kasunod na mas malaki. (Joy Cantos)