Sekyu patay, 1 pa malubha sa van

NUEVA VIZCAYA – Isang security guard ang nasawi habang isa pa ang kasalukuyang nakikipag-agawan sa kamatayan matapos na aksidenteng bungguin ng isang rumaragasang van kamakalawa ng gabi sa Solano, lalawigang ito.

Ayon kay P/Chief Insp. Francisco Palattao Jr., agad na binawian ng buhay ang biktima na si Walter Aquino, habang ang kanyang kaibigan na nasa kritikal na kondisyon ay nakilalang si Wilbert Cortez, isang driver at kapwa residente ng Brgy. Paniki, Bagabag, Nueva Vizcaya.

Sa isinagawang imbestigasyon ng Solano PNP, naganap ang insidente bandang alas-11:30 ng gabi sa kahabaan ng national highway ng Solano habang ang magkaibigan ay tumatawid sa nasabing kalsada.

Huli na nang mapansin ng driver ng Pregio van (RBW-151) na si Angelito Lopez, ng District 1 Poblacion, San Mateo, Isabela ang dalawang biktima kung kaya nasapol niya ang mga ito at tumilapon.

Matapos na isugod sa Veterans Regional Hospital ang mga biktima, agad na idineklara ng mga manggagamot na dead-on-arrival si Aquino habang inoobserbahan ng mga manggagamot ang kondisyon ng kanyang kaibigan na nagtamo ng matinding sugat sa iba’t ibang bahagi ng kanyang katawan.

Si Lopez ay kusa namang sumuko sa pulisya matapos ang nasabing aksidente. (Victor Martin/Charlie Lagasca)