Bala, sinalo ng anak

CAVITE — Isang 12-anyos na lalaki ang umako ng kamatayan na sana’y sa kanyang amain matapos na pagbabarilin ng kapitbahay habang magkasalong kumakain ang biktima at amain nito sa sariling bahay sa Sitio Baliktid na sakop ng Barangay Santiago, General Trias, Cavite kamakalawa.

Dead-on-the-spot ang biktimang si Lester Ilas matapos na masapol ng bala ng M16 Armalite rifle sa batok, habang nakaligtas naman ang amain na si Valentine Pernalla na pinaniniwalaang wanted sa kasong murder may isang buwan na ang nakalipas, ayon sa ulat ng pulisya.

Napag-alaman kay PO1 Melencio Malomay III, na kaarawan ng biktima kaya dumalaw ang amain nito at magkasalong naghapunan bandang alas-7:30 kamakalawa ng gabi.

Ayon pa sa ulat, natiktikan ng suspek na si Franco Javier na dumalaw si Valentine sa kanyang anak sa nabanggit na barangay kaya tinungo nito ang bahay.

Nang mamataan ng suspek si Valentine ay agad na nagpakawala ng sunud-sunod na putok ng baril hanggang sa tamaan ang biktima.

May paniniwala si P/Chief Inspector Conrado Gongon, police chief ng General Trias PNP na pinaghigantihan ng suspek si Valentine na pinaniniwalaang pumatay sa kanyang asawang si Sarina Javier dahil sa pinag-awayang lupa. (Ulat nina Lolit Yamsuan at Cristina Timbang)