Pulis tinodas ng kabaro

CAMP CRAME — Isang tauhan ng PNP-Special Action Force ang iniulat na nasawi makaraang barilin ng kabarong pulis sa Barangay Kimagango, Midsayap, Cotabato, ayon sa ulat kahapon. Hindi na umabot ng buhay sa Community Doctors Hospital ang biktimang si PO1 Oliver Sanggadan na nakabase sa bayan ng Pikit, samantalang nadakma naman ang suspek na si PO2 Awrowland Stonelle Andawey matapos na maganap ang krimen bandang alas-9:20 ng gabi. Sa ulat, nagtalo ang dalawa sa hindi nabatid na dahilan hanggang sa magbunot ng baril ang suspek at paputukan ang biktima. (Ulat ni Joy Cantos)