Asset ng militar nilikida ng NPA rebels

Camp Aguinaldo — Brutal ang sinapit na kamatayan ng isang asset ng military matapos itong pagbabarilin at pagsasaksakin ng apat na armadong kalalakihan na nagpakilalang miyembro ng New People’s Army (NPA) sa San Jacinto, Masbate kamakalawa.

Nakilala ang biktima na si Rodel Bartolay, 29 anyos, residente ng Brgy. Anibong ng nasabing munisipalidad. Ang biktima ay tadtad ng mga tama ng saksak sa iba’t ibang bahagi ng katawan na siya nitong dagliang ikinasawi.

Sa report, dakong alas-11 ng gabi nang bigla na lamang sumulpot ang mga rebelde sa bisinidad ng Hacienda Espinosa sa Brgy. Jagnaan, San Jacinto, Masbate at dito’y pinagbabaril ang biktima.

Bago tuluyang nagsitakas ay pinagsasaksak pa ng mga rebelde ang biktima upang makasiguro ang kamatayan ng kanilang target.

Pinaniniwalaang ang pamamaslang sa biktima ay may kinalaman sa pagiging asset nito ng militar kung saan nagresulta ito sa pagkapilay ng kilusan ng mga rebelde sa nasabing lalawigan. (Joy Cantos)