Ambush: Barangay chairman todas

TAGAYTAY CITY, Cavite – Tinambangan at napatay ang isang 40-anyos na barangay chairman ng mga hindi kilalang armadong kalalakihang naka-motorsiklo habang ang biktima ay nagmamaneho ng patrol dyip na ikinasugat naman ng malubha ng tatlong iba pa kamakalawa ng gabi sa Barangay Iruhin Sentral, Tagaytay City, Cavite.

Duguang bumulagta sa manibela ng patrol dyip ang biktimang si Barangay Chairman Domingo Villasis ng Barangay 5, Amadeo, Cavite.

Si Villasis ay nagmamaneho ng barangay patrol dyip patungo sa bayan ng Amadeo mula sa Tagaytay Highland Hotel nang dikitan at pagbabarilin ng naka-motorsiklong dalawang hindi kilalang armadong lalaki dakong alas-6 ng gabi. Kasalukuyan naman ginagamot sa Ospital ng Tagaytay dahil sa tinamong tama ng bala sa iba’t ibang katawan sina: Evelyn Halayahay, 25; Marife Rodil, 24, kapwa empleyada ng nasabing hotel; at Nenita Malana, 38, barangay chairwoman ng Tartarya sa bayan ng Silang. Lumilitaw sa imbestigasyon, kahit na sugatan si Vilasis ay nakuha pa nitong patakbuhin ang barangay patrol dyip upang takasan ang naka-motorsiklong killer, subalit sumalpok sa sementadong pader.

Ipinag-utos naman ni P/Supt. Bebot Quimio, Tagaytay police chief sa kanyang mga tauhan na madaliin ang pagdakip sa mga killer na pansamantalang hindi ibinunyag ang kinaroroonan. (Ulat nina Cristina G. Timbang, Lolit Yamsuan at Rene M. Alviar)