Shootout: Tulak ng droga patay

CAMP CRAME – Nakipagbarilan hanggang sa mapatay ang isang 42-anyos na notoryus drug pusher makaraang magsagawa ng buy-bust operation sa sayawan na sakop ng Barangay Sta. Cruz, San Francisco, Camotes, Cebu kamakalawa, ayon sa ulat kahapon. Nakilala ang nasawing tulak na si Remegio Arias, kabilang sa drug watchlist ng Phil. Drug Enforcement Agency (PDEA). Base sa ulat, nagpanggap na poseur buyer ang isang pulis para makabili ng shabu kay Arias sa sayawan. Imbes na sumuko si Arias nang maaktuhan ay kumaripas ng takbo hanggang sa makipagbarilan sa mga tumutugis na pulis. Nakumpiska kay Arias ang dalawang piraso ng sachet na shabu, P2,000 at kalibre.45 baril na ginamit sa shootout. (Ulat ni Joy Cantos)