2 biktima ng ‘salvage’ natagpuan

CAVITE –Dalawang kalalakihan na pinaniniwalaang biktima ng summary execution ang nadiskubre sa magkahiwalay na barangay sa Cavite kahapon ng umaga. Bandang alas-7:30 nang madiskubre ang unang bangkay sa Barangay Sungay East, Tagaytay City na may tama ng bala ng baril sa ulo at nakatali ang mga kamay. May taas na 5’5’’ at nakasuot ng kulay gray na pantalon at asul na t-shirt na may markang GRM International, Inc. Ikalawang bangkay naman ang natagpuan sa Talisay Road, Barangay Lapidario, Trece Martirez City dakong alas-11 ng umaga. May taas na 5’3’’ at may tattoo sa braso na "Jhokes" at sa kaliwang braso naman ay "Rema 4-Ecer", nakasuot ng pantalong maong at puting t-shirt. May teorya ang pulisya na pinatay ang dalawa sa ibang bayan bago itinapon sa nabanggit na barangay. (Ulat ni Cristina G. Timbang)