Hepe ng brgy. tanod nilikida

LEGAZPI CITY – Binistay ng bala ng malalakas na kalibre ng baril ang katawan ng isang 50-anyos na hepe ng barangay tanod makaraang pasukin ng mga rebeldeng New People’s Army (NPA) ang bahay ng biktima sa Barangay San Rafael, Castilla, Sorsogon kamakalawa. Nagmamakaawa pa sa mga rebelde ang napatay na biktimang si Efren Milanes, may asawa, magsasaka at residente ng nabanggit na lugar. Sa nakalap na impormasyon ng pulisya, pinagbantaan ng NPA ang biktima na tumigil na sa pakikipagsabwatan sa militar at pulisya upang humaba pa ang buhay, subalit binalewala nito ang banta hanggang sa maganap ang pamamaslang. (Ulat ni Ed Casulla)