Driver binoga ng 2 pasahero

Tiaong, Quezon – Sabog ang bungo at namatay noon din ang isang jeepney driver matapos na barilin ng dalawang di pa nakilalang lalaki na pasahero nito sa Brgy. Lagalag sa bayang ito kamakalawa ng gabi.

Kinilala ng pulisya ang biktima na si Rodel Menor, 31 anyos , may-asawa at residente ng Brgy. Lusacan habang patuloy namang pinaghahanap ng pulisya ang dalawang salarin na mabilis na tumakas tangay ang .45 caliber pistol na ginamit sa pamamaslang.

Sa isinagawang imbestigasyon ni PO1 Dennis Rivera, may hawak ng kaso, dakong alas-7:30 ng gabi habang minamaneho ng biktima ang isang pampasaherong jeepney na may plakang DHG -331 na patungo sa Candelaria, Quezon nang pagbabarilin ng mga suspek pagsapit sa Brgy. Lagalag.

Inaalam pa ng mga awtoridad ang motibo ng pamamaslang sa biktima. (Ulat ni Tony Sandoval)