Dalagita ni-rape ng negosyante

CABANATUAN CITY – Luhaang dumulog sa himpilan ng Criminal Investigation and Detection Group (CIDG) ang isang 16-anyos na babae na hinalay ng walong beses ng kilalang negosyante sa bayan ng Talavera, Nueva Ecija simula pa noong Enero 8 hanggang Enero 12, 2004. Ang biktimang itinago sa pangalang Marlen ay limang araw na hinalay ng suspek na si Nestor Yauco ng Brgy. Matias District. Ayon sa pulisya, niyaya ng suspek ang biktima na magmeryenda sa gasolinahan subalit sa resort siya dinala hanggang sa maganap ang unang maitim na balak. Napag-alaman pa na dinala ang biktima sa bahay ng lola ng suspek sa Brgy. Poblacion at muling isinagawa ang panghahalay hanggang sa palayain siya ng suspek. (Ulat ni Christian Ryan Sta. Ana)