Pulis itinumba

MAUBAN, Quezon – Pinagbabaril hanggang sa mapatay ang deputy chief of police ng bayang ito ng mga rebeldeng New People’s Army (NPA) makaraang harangin ang traysikel na sinasakyan ng biktima sa Quezon Street, Barangay Poblacion kamakalawa ng hapon.

Napuruhan ang biktimang si SPO3 Paulino Mancenido, samantalang ang mga rebeldeng tinedyer ay naglakad palayo sa pinangyarihan ng krimen na parang walang anumang nangyari. Napag-alaman sa ulat na tinangay ng mga rebelde ang baril at cellphone ng biktima. May kumalat na balita na sangkot ang biktima sa illegal fishing at droga kaya hinatulan ng kamatayan ng makakaliwang kilusan sa ilalim ng Apolonio Mendoza Command. (Ulat ni Tony Sandoval)