2 patay, 1 grabe sa banggaan

Sto. Domingo, Nueva Ecija – Dalawa katao ang nasawi samantalang isa pa ang grabeng nasugatan makaraang magbanggaan ang isang pampasaherong jeepney at kasalubong nitong motorsiklo sa kahabaan ng Maharlika highway, Brgy. Baloc, sa bayang ito kamakalawa ng gabi.

Binawian ng buhay habang isinusugod sa Dr. Paulino Garcia Extension Hospital sa bayan ng Talavera ang mga biktimang sina Efren Montelano, ng Brgy. Poblacion East, Muñoz Science City at Romeo Secretario ng Brgy. Bantog , Muñoz na pawang nasa hustong gulang.

Kinilala naman ang nasugatang biktima na ginagamot sa nasabing pagamutan na si Jerry Padiro, 39 anyos , may-asawa at naninirahan sa Brgy. Bantog sa bayan ng Muñoz.

Sa imbestigasyon, bandang alas-6 ng gabi habang sakay sina Montelano at Secretario sa Sym Star motorcyle na walang plaka nang salpukin ng kasalubong nitong pampasaherong jeepney na may plakang CWN -215 na minamaneho ni Padiro sa nasabing lugar.

Nabatid sa imbestigasyon na nag-overtake sa kasunod na sasakyan ang motorsiklo bunsod upang masalpok naman ito ng kasalubong na pampasaherong jeepney. (Ulat ni Christian Ryan Sta. Ana)