Dead on the spot ang biktimang kinilalang si Amrik Singh, 36 anyos, naninirahan sa Zarate Subdivision sa Dagupan City matapos magtamo ng malalalim na saksak sa katawan.
Base sa report, bandang alas-12:50 ng tanghali ng marekober ang bangkay ng biktima sa loob ng kaniyang Toyota Tamaraw FX na may plakang TRN-245 na nakaparada sa national highway, Brgy. Minlen East sa bayan ng Sta. Barbara ng lalawigang ito.
Ayon sa teorya ng mga awtoridad malaki ang posibilidad na nanlaban ang biktima sa hindi pa nakilalang holdaper na nangholdap dito sa loob mismo ng kaniyang behikulo. Nabatid na nawawala ang mga alahas, cellphone, pera at iba pang mga kagamitan ng biktima.
Isang residente sa lugar ang nakakita umano sa suspek ilang oras bago nadiskubre ang krimen na nagmamadaling bumaba sa sasakyan. Kasalukuyan pang iniimbestigahan ng mga awtoridad ang kaso. (Ulat ni Joy Cantos )