Amasona dedo sa engkuwentro

KAMPO SIMEON OLA – Nalagasan ang grupong makakaliwa sa naganap na engkuwetro laban sa tropa ng militar matapos na dumulagta ang isang amasonang New People’s Army (NPA) sa kagubatan ng Sitio Muladbukad, Barangay San Isidro, Castilla, Sorsogon kahapon ng umaga.

Bukod sa nasawing NPA na si Susan Aringo ay nasakote naman ang kasama nitong si Ruben Certiza na ngayon ay ginagamot sa Sorsogon Provincial Hospital dahil sa tama ng bala. Ayon sa ulat, sumiklab ang engkuwentro matapos na mamataan ng tropa ng 5th CAA Patrol Base ng Phil. Army ang grupo ng rebelde na nangongolekta ng revolutionary tax sa mga residente. Tumagal ng 10 minuto ang putukan bago umatras ang mga rebelde at iniwan ang bangkay ni Aringo at sugatang si Certiza. (Ulat ni Ed Casulla)