3 biktima ng ‘salvage’ natagpuan

RIZAL – Tatlong bangkay ng lalaki na pinaniniwalaang naging biktima ng summary execution ang natagpuan sa magkakahiwalay na barangay sa Antipolo City kahapon ng madaling-araw. Unang natagpuan ang bangkay ng isang lalaki sa kahabaan ng Cabrera Road na sakop ng Barangay San Roque bandang alas-12:40 ng madaling-araw at kasunod na natagpuan ang dalawa pa sa liblib na bahagi ng Sitio Cabading, Barangay Maarawan. Ang tatlong bangkay na natagpuan ay pawang tadtad ng saksak ng patalim at tama ng bala ng baril sa iba’t ibang bahagi ng katawan. Bukod sa mga palatandaang pinahirapan ay tinakpan pa ng packing tape ang buong katawan. Kasalukuyan pang bineberipika ang pagkikilanlan ng tatlo. (Ulat ni Edwin Balasa)