Kidnaper ng dalagita timbog

NUEVA ECIJA – Bumagsak sa kamay ng pulisya ang kidnaper ng 12-anyos na babae makaraang mamataan ang una na nagmamaneho ng traysikel sakay ang biktima sa Barangay Poblacion Sur, Licab, Nueva Ecija kamakalawa ng tanghali. Base sa ulat ni P/Supt. Rhoderick Armamento na isinumite kay P/Sr. Supt. Luisito Palmera, bandang alas-12:55 ng tanghali nang mamataan ni Freddie Domingo ang traysikel na lulan ang biktimang si April Esguerra at nanlalaban sa suspek na si Edgardo Dulay ng Barangay Poblacion Norte. Agad naman ipinagbigay-alam sa pulisya ang pangyayari kaya mabilis naman nasakote ang suspek. Napag-alaman pa na ang biktima ay naglalakad papauwi nang harangin ng suspek at sapilitang isinakay sa traysikel at may posibilidad na hahalayin ang dalagita. (Ulat ni Christian Ryan Sta. Ana)