3 dedo, 3 sugatan sa ratrat ng NPA

DARAGA, Albay –Tatlo-katao kabilang na ang dalawang sundalo ng militar ang iniulat na nasawi, samantala, tatlo naman ang nasugatan makaraang ratratin ng mga rebeldeng New People’s Army (NPA) ang mga biktima sa tupadahan na sakop ng Barangay Villahermosa sa bayang ito kamakalawa ng hapon.

Kabilang sa nasawi ay nakilalang sina T/Sgt. Angelo Magdasoc, S/Sgt. Danilo Apostol na kapwa miyembro ng 901st Infantry Brigade at ang sibilyang si Jose Madelar Jr. ng Barangay Cumapocapo, Pilar, Sorsogon.

Tinamaan naman ng ligaw na bala ng baril ang mga biktimang sina Jesus Forendino, Amilo Llona at Domingo Friolo na pawang residente ng nabanggit na bayan.

Naitala ng pulisya ang pangyayari dakong alas-3:45 ng hapon matapos na dumating ang mga rebelde habang nagsasabong ang mga biktima.

Napag-alaman pa na kahit na may tama ng bala ng baril ang dalawang sundalo ay nakipagpalitan pa ng putok sa mga rebelde pero namatay din.

Nabatid pa na ang mga tinedyer na rebelde ay bagong kasapi ng makakaliwang kilusan at nasa ilalim ng test mission. (Ulat ni Ed Casulla)