Bitay sa nagpasabog ng granada

Kinatigan ng Korte Suprema ang naunang hatol na bitay ng mababang korte laban sa nagpasabog ng granada sa bahay ng isang pamilya na ikinasawi ng isa at apat naman ang malubhang nasugatan sa Zaragoza, Nueva Ecija noong Mayo 1994.

Sa 23-pahinang desisyon ng Supreme Court, pinagtibay ang naunang desisyon ng Cabanatuan City Regional Trial Court Branch 29 na patawan ng hatol na bitay si Cirilo Magallona.

Si Magallano ay napatunayang naghagis ng granada sa bahay ni Rosendo Arimbuyutan Sr. na ikinasawi ng anak nitong si Resty at ikinasugat ng malubha ng apat pang miyembro ng pamilya.

Binalewala naman ng Korte Suprema ang depensa ni Magallona na nagsabing hindi niya kilala ang dalawang tumestigo laban sa kanya.

Gayunman, binigyang timbang ng Supreme Court ang salaysay ng mga testigo na ang akusado ay siyang umaaligid sa bahay ng pamilya Arimbuyutan bago pa maganap ang pagsabog. (Ulat ni Grace dela Cruz)