3 karnaper nasakote

PANTABANGAN, Nueva Ecija – Tatlong kalalakihan na pinaniniwalaang mga karnaper ang iniulat na inaresto ng tropa ng militar sa checkpoint na sakop ng Barangay Cadaclan sa bayang ito noong Linggo ng madaling-araw.

Ang tatlo na nakumpiskahan ng mga baril ay nakilalang sina Virgilio Rubio, 27, ng Barangay Villa Paraiso, Rizal, Nueva Ecija; Ariel Ruiz, 19, ng Barangay Sampalok at Leo Bagawe, 28, ng Barangay Marikit.

Narekober sa mga suspek ang behikulong may plakang CRU-843 na pag-aari ni Jane Chavez na kinarnap sa Rizal, Nueva Ecija.

Sa ulat ng pulisya, tinutugis ng pulisya ang mga suspek nang mapadaan sa checkpoint bandang ala-1 ng madaling-araw. Hindi na nakapalag ang tatlo matapos na makipag-ugnayan ang kapulisan sa mga tauhan ng 70th Infantry Battalion ng Philippine Army. (Ulat ni Christian Ryan Sta. Ana)