Palpak na ambush ng NPA

CARRANGLAN, Nueva Ecija – Nakaligtas sa tiyak na kapahamakan ang mga sundalo ng Phil. Army nang tambangan ng mga rebeldeng New People’s Army (NPA) sa Barangay Digdig, sa bayang ito, kamakalawa ng umaga.

Sa ulat ni Maj. Gen. Alberto Braganza, lumalabas na binabagtas ng mga elemento ng 5th Infantry Division ng Phil. Army ang kahabaan ng Maharlika Highway mula sa Camp Aguinaldo patungong bayan ng Gamu, Isabela nang maganap ang pananambang dakong alas-6:20 ng umaga.

Nabatid na medyo palpak ang atake ng mga rebelde kaya ang route security team na pinamumunuan ni 2Lt. Armand Gutierrez ng 71st Infantry Battalion ay nagawang makaganti ng putok hanggang umabot sa isang oras ang engkuwentro.

Napag-alaman na sumaklolo rin ang pulisya ng Nueva Ecija sa pamumuno ni P/Supt. Rhoderick Armamento kaya nagpulasan ang mga rebelde patungo sa direksyon ng hilagang-silangan bitbit ang sugatang mga kasamahan, ayon sa militar.

Samantala, inaresto naman si Joselito Joaquin, isang lider ng NPA na ngayon ay isinasailalim sa tactical interrogation. (Ulat ni Christian Ryan Sta. Ana)