Sekyu tinodas sa harap ng pamilya

CAMP PANTALEON GARCIA, Cavite – Binaril at napatay sa harap ng kanyang pamilya ang isang 42-anyos na security guard sa pamilihang bayan ng dalawang armadong kalalakihan habang ang biktima ay nagmamaneho ng owner-type jeep sa kahabaan ng highway na sakop ng Barangay Punta Dos, Tanza, Cavite kamakalawa ng gabi.

Idineklarang patay sa Del Rosario Hospital si Tomas Pangilinan makaraang tamaan ng bala ng baril sa tagilirang bahagi ng katawan.

Samantala, ang dalawang killer ay mabilis na tumakas sakay ng motorsiklo sa hindi nabatid na direksyon.

Sa inisyal na imbestigasyon ni PO1 Richard Atienza, naitala ang krimen dakong alas-9:20 ng gabi habang minamaneho ng biktima ang dyip na may plakang VBK-288.

Mabagal na minamaneho ng biktima ang dyip nang lapitan ng dalawang nakamotorsiklo bago pinaputukan sa tagiliran at pinalalagay na nakaalitan ni Pangilinan ang mga killer. (Ulat ni Cristina G. Timbang)