Mag-ama nilikida ng NPA

CAMP AGUINALDO — Luksa ang Bagong Taon ng pamilya ng mag-amang itinuturong informer ng militar matapos bistayin ng bala ng dalawang rebeldeng New People’s Army (NPA) sa Ozamis City, Misamis Occidental, ayon sa ulat ng militar kahapon.

Dead-on-the-spot ang mag-amang sina Eduardo Canencia, 40, at anak nitong si Marlon.

Batay sa ulat, ang krimen ay naganap dakong alas-12:30 ng tanghali sa mismong bahay ng mag-ama sa Purok 1, Brgy. Labinay ng nasabing lungsod.

Agad namang natukoy ang mga suspek na sina Carlito Manus, alyas Ka Dodong at Gerry Lagaret na positibong kinilala ng ilang nakasaksi sa krimen. (Ulat ni Joy Cantos)