Mag-utol kritikal sa mag-ama

TANZA, CAVITE–Nasa kritikal na kundisyon ngayon ang magkapatid na welder makaraang makipagtagaan ang mga ito sa mag-amang karpintero kamakalawa ng gabi sa Brgy. Calibuyo ng bayang ito.

Ang magkapatid na isinailalim sa matinding gamutan sa hindi binanggit na ospital ay kinilalang sina Benjamin, 37at Francis Verano, 24 kapwa binata at residente ng Brgy. Calibuyo.

Agad namang naaresto ang mag-amang suspek na sina Jesus, 58 at Wilson Pantinople,16 kapwa residente rin ng nabanggit na barangay.

Sa ulat ni PO1 Richard Atienza, dakong alas-6:00 ng gabi nang harapin ng lasing na magkapatid Verano na armado ng tubo at patalim ang mag-amang Pantinople.

Hindi naman nagpatalo ang mag-amang Pantinople at kumuha ng jungle bolo at agad na sinugod ang magkapatid.

Dahil sa kalasingan ay nadaig ng mag-ama ang magkapatid kung saan nagtamo ang mga ito ng malalalim na sugat sa ibat-ibang parte ng katawan.

Agad namang naaresto ng mga rumespondeng pulis ang mag-ama kung saan sasampahan ito ng kasong frustrated homicide. (Ulat ni Cristina Go Timbang)