Barangay Chairman binanatan ng NPA, todas

CAMP OLIVAS, Pampanga – Muli na namang bumanat ang mga rebeldeng New People’s Army matapos na pagbabarilin hanggang sa mapatay ang isang barangay chairman sa bayan ng San Jose, Tarlac noong Sabado, Nobyembre 2, 2002.

Sa ulat na isinumite kay P/Senior Supt. Mario Sandiego, Tarlac police director, kasalukuyang nagbibilad ng palay ang biktimang si Domingo Gonzales kasama ang kanyang asawa at pitong tauhan sa barangay road na sakop ng Iba, San Jose nang biglang sumulpot ang tatlong kalalakihang nakasumbrero at maskara bago sunud-sunod na nagpaputok.

Matapos isagawa ang pamamaril ay nagsitakas ang mga rebelde sa direksyon ng katimugang bahagi ng nabanggit na lugar.

Kaagad naman dinala ang biktima sa Central Luzon Doctor’s Hospital sa Tarlac City ngunit idineklarang patay ng mga doctor.

Kasalukuyan naman sinisilip ng pulisya ang ilang anggulo sa naganap na pamamaslang sa biktima. (Ulat ni Ric Sapnu)