14 anyos na NPA naaresto

Isang grade 5 pupil na hinihinalang miyembro ng New Peoples Army (NPA)ang naaresto kamakalawa ng mga elemento ng Philippine Army sa Paluig, Zambales.

Nabatid sa ulat mula sa tanggapan ni Sr. Supt. Conrado Briton, Officer In-Charge (OIC) ng Central Luzon Police na ang nadakip ay kinilalang si Barge de Belen (di tunay na pangalan) 14-anyos at estudyante ng Mangahan Elementary School ng bayang ito.

Sinabi ni Briton na ang pinagsanib na puwersa ng Zambales police at army troopers ang siyang responsable sa pagkakaaresto sa suspek base na rin sa intelligence report na nakarating dito.

Nabatid na ang suspek ay naaktuhan na may dala-dalang M-14 armalite rifle, seven magazines at 85 rounds ng ammunition na pawang nakasilid sa loob ng bag.

Inamin naman ng suspek na siya ay regular na miyembro ng CPP/NPA nang ito ay tanungin ng mga government troopers.

Kasalukuyang sumasailalim sa isang tactical interrogation ng 24th Army Infantry Battalion headquarters sa Barangay Bulawen, Paluig town. (Ulat ni Ric Sapnu)