Nabatid sa ulat na naghihintay na lamang ng direktiba kung saan dadalhin si Erobas o pananatilihin ito sa PNP Negros Occidental upang doon gisahin o kailangan pang dalhin ito sa punong tanggapan ng National Bureau of Investigation(NBI) at dito isasagawa ang interogasyon.
Pinaniniwalaan na si Erobas pinuno ng Espedijec Ideology na nagpapalaganap ng prinsipyo ng Global One Man Rule Program 1000 years ay may diperensiya sa pag-iisip.
Iginiit ng Senado na ang patuloy na lumalaking bilang ng mga miyembro nito partikular yaong mga kabataang babae at hinihikayat na makipagtalik sa mga may edad na lalaking miyembro ay isang krimen na kailangang pigilin.
Sinabi pa ni Erobas na nagsabing sinapian siya ng kaluluwa ni dating Sen. Benigno Aquino Jr. na isang Euthopian society ang layunin ng kaniyang kulto, gayunman ay mabilis na nagpalabas ng direktiba sina Sen. Robert Jaworski at Loren Legarda Leviste upang siyasatin ang sex cult na nakabase sa Negros Occidental at dakpin ang lider nito upang papanagutin sa paghihikayat nito sa mga menor de edad na maging miyembro ay makipagniig sa iba pang kasapi nito.
Samantalang iginiit naman ni Sen. Francis Pangilinan na walang sinumang opisyal ang dapat na magsabi na wala sa tamang katinuan si Erobas kundi ang korte at kapag napatunayan na sira nga ang ulo nito ay dapat na ikulong ito sa mental hospital.(Ulat nina Rudy Andal at Gemma Amargo)