10-anyos napatay dahil sa trapik

GENERAL TRIAS, Cavite – Matinding trapik at pagkalubog ng gulong ng isang pick-up van ang naging ugat ng maagang kamatayan ng sampung taong gulang na batang babae matapos na mabaril sa ulo ng drayber habang nakasakay ang biktima sa isang van sa Brgy. Santiago sa bayang ito kahapon ng umaga.

Idineklarang patay sa General Trias Pediatric and Maternity Clinic ang biktimang si Lizel Sion ng nabanggit na barangay.

Samantala, ang suspek na kaagad namang pinaharurot ang kanyang sasakyan ay nakilalang si Antonio "Toto" Rosales, may sapat na gulang at hindi nabatid ang tirahan.

Hindi naman nakuha ang numero ng plaka ng sasakyan ng suspek sa hindi nabatid na dahilan.

Naganap ang krimen bandang alas-6:45 ng umaga habang nasa matinding trapik ang sasakyan ng suspek at sinasakyan ng biktima.

Sa nakalap na impormasyon ni SPO1 Victorino Patam, minasama at nairita ang suspek sa pagkakatingin ng drayber na sinasakyang van ng biktima dahil sa nalubak ang gulong nito sa kanal.

Dito na nagsimulang bunutin ang baril ng suspek at pinaputukan ang drayber ngunit sa ulo ng biktima tumama na ikinasawi nito. (Ulat nina Cristina Go-Timbang at Mading Sarmiento)