17 silid aralan nasunog

CASTILLEJOS, Zambales – Tinatayang aabot sa halagang P10 milyon ari-arian ang tinupok ng apoy matapos na masunog ang may labimpitong silid-aralan ng Castillejos Central Elementary School sa Brgy. San Juan sa bayang ito kahapon ng umaga.

Sinabi ni Corazon Perez, punong-guro ng nabanggit na paaralan na apektado ang may 730 mag-aaral na kasalukuyang naka-enroll.

Base sa inisyal na ulat, nagsimulang kumalat ang apoy mula sa isang silid-aralan bandang alas-6 ng umaga hanggang sa tupukin ang iba pang kuwarto.

Wala namang naiulat na nasawi o nasugatan sa naganap na sunog dahil na rin sa mabilis na responde ng mga pitong pamatay-sunog mula sa Subic Bay Metropolitan Authority (SBMA), San Marcelino, San Antonio, San Felipe, SBMA Subic Shipyard, Castillejos at iba. (Ulat ni Erickson Lovino)