US Marines, Abu nagbanatan

ISABELA CITY, Basilan – Dalawang miyembro ng US Marines at ibang sundalong Pinoy na nagsisilbing guwardiya sa paligid ng ginagawang road construction ang pinagbabaril ng mga snipers ng teroristang Abu Sayyaf group subalit gumanti naman ng putok ang mga sundalong Kano sa naganap na sagupaan sa Brgy. Maligue sa lungsod na ito kamakalawa.

Ang naganap na banatan ay nagsimula dakong alas-3:45 ng hapon na kinumpirma naman ni Lt. Commander Jeff Davis, tagapagsalita ng US Pentagon.

Sa ulat ng militar, kasalukuyang binabantayan ng mga US Marines, kasama ang mga sundalong mula sa 55th Infantry Battalion ng Phil. Army ang road construction project ng Army’s Engineering Brigade, katuwang ang US Engineers nang biglang ratratin ng mga teroristang Abu Sayyaf.

Gayunman, gumanti ng putok ang dalawang US Marines na tumagal ng limang minuto bago nagsitakas ang mga armadong kalalakihan makaraang matunugang may paparating na back-up na militar.

Ito ang ikalawang pag-atake sa US personnel na unang binanatan ay ang dalawang US Pave Hawks na nagsasagawa ng surveillance mission sa Bohe Tambis, Tuburan, Basilan noong Mayo 27, 2002. (Ulat ni Joy Cantos)