3 suspek sa Cabuyao masaker timbog

Tatlong kalalakihan na pinaniniwalaang responsable sa Cabuyao masaker ang bumagsak sa kamay ng mga ahente ng National Bureau of Investigation (NBI) sa isinagawang dragnet operation sa Cabuyao, Laguna kamakalawa.

Pormal na sinampahan ng kasong murder ang mga suspek na sina Jose "Jun" Bascon III ng Roseville Subd., Sta. Rosa, Laguna; Mario Caparas ng Tamis Compd., Banlik, Cabuyao at Eduardo Cayaban ng Anahaw Homes, Dita, Sta. Rosa, Laguna.

Sa ulat ng NBI, ang mga suspek ay responsable sa pagpatay kina Mauro Amarante, Corazon Aguilar, Luisito Aguilar at Alicia Amarante ng Brgy. Marinig, Cabuyao, Laguna noong Mayo, 21, 2002.

Minasaker ng mga suspek ang apat dahil sa hindi nagbigay ng napagkasunduang halagang P.3 milyon bilang kabayaran sa kanilang ginawang pagpatay sa naging kaalitan ng mga biktima. (Ulat ni Ellen Fernando)