2 dedo, 2 grabe sa road mishap

SILANG, Cavite – Dalawa katao ang kumpirmadong nasawi, samantalang dalawa pa ang malubhang nasugatan matapos na sumalpok ang sinasakyang pick-up ng mga biktima sa sementadong pader ng tulay sa Barangay Lilit sa bayang ito kamakalawa ng gabi.

Ang namatay na biktima ay nakilalang sina Pedro Sapida, 61, residente ng 439 Barangay Anabu I, Imus, Cavite at Robert Hidalgo ng AFP housing project, Barangay Old Bulihan sa bayang ito.

Samantala, ang mga biktimang nasugatan naman ay nakilalang sina Christian Sapida, 21 at Gregorio Pereña, 34, na kapwa residente ng General Trias, Cavite.

Sa inisyal na imbestigasyon ni PO1 Erick Ambojia, may hawak ng kaso, nawalan ng kontrol ang manibela ng sasakyan (WDR-912) na hawak ni Christian dakong alas-8:45 ng gabi kaya sumalpok sa pader na pinaniniwalaang lango pa sa alak ang driver.

Napag-alaman pa sa ulat ng pulisya na nagmula ang mga biktima sa kapistahan sa bayan ng Amadeo, Cavite bago naganap ang road mishap.(Ulat ni Mading Sarmiento)