Dentista patay, 3 grabe sa car mishap

LUCBAN, Quezon – Isang lady dentist ang iniulat na nasawi, samantala, tatlo pang iba ang malubhang nasugatan makaraang mahulog ang sinasakyang pick-up ng mga biktima sa malalim na creek sa Brgy. May-it sa bayang ito noong Marso 18 ng gabi.

Si Gina Carida Bernardo, 34, driver ng nahulog na Nissan Frontier pick-up ay nasawi, samantala, ang kasamahan na grabeng nasugatan ay nakilalang sina Nataniel Mata, 34, ng #4 Plaridel St.; Rechie Beatriz y Enata, 30, ng Countryside Village at Margarita Platino, 30, dalaga, ng 15 Regidor St. ng naturang bayan.

Nabatid sa ulat ng pulisya, naganap ang aksidente bandang alas-11:14 ng gabi makaraang iniwasan ng sasakyang minamaneho ni Gina ang sako ng basura sa tulay ng Prinsesa kaya nawalan ng kontrol at nagtuluy-tuloy sa malalim na creek.

Kaagad namang ipinaalam ang pangyayari sa asawa ni Gina na isang kontratista ng DPWH sa 1st district ng Quezon na nakatira sa Red-V Subd., Brgy. Ayuli ng naturang lugar. (Ulat ni Tony Sandoval)