Empleyada ng EPZA tinodas ng 2 holdaper

BACOOR, Cavite – Dahil sa walang makuhang malaking halaga ay pinagbabaril hanggang sa mapatay ang isang empleyada ng EPZA ng dalawang hindi kilalang holdaper at ikinasugat naman ng malubha ng lalaking kasama nito habang magkasamang naglalakad sa kahabaan ng Gen. E. Aquinaldo Highway, Brgy. Talaba 2 ng bayang ito kamakalawa ng gabi.

Kinilala ng pulisya ang biktima na si Elsie Toledo, 18, dalaga ng Brgy. Talaba 6, samantala, ginagamot naman si Michael Obaniel, 22, may asawa ng Brgy. Talaba 2, Bacoor.

Sa inisyal na imbestigasyon ni SPO1 Rodolfo Arboleda, naganap ang krimen dakong alas-10:30 ng gabi nang harangin ng isang alyas Boy Visaya at isang hindi nakilalang lalaki na pinaniniwalaang nagkukuta sa nabanggit na barangay. (Ulat ni Cristina Go-Timbang)