Preso sa CIDG 4 pumuga o pinapuga?

Pinaniniwalaang may misteryong bumabalot sa kaso ng isang lalaki na may kasong large scale estafa na nalambat ng mga ahente ng Criminal Investigation and Detection Group (CIDG 4) noong Agosto, 23, 2001 na nagawang tumakas o pinatakas nitong nakaraang Pebrero 1, 2002 sa kinapipiitang kulungan.

Si Felino Rodriguez, 31 na inisyuhan ng warant of arrest ni RTC Judge Juanita T. Guerrero sa kasong large scale estafa at walang rekomendasyong piyansa ay pinaniniwalaang nakipagsabwatan sa ilang mataas ng opisyal ng CIDG 4 upang maisagawang pumuga noong Pebrero 1, 2002 dakong alas 4:30 ng hapon.

Sa nakalap na impormasyon na may kumakalat na balita sa loob mismo ng tanggapan ng CIDG 4 na nagbigay ng halagang P.1 milyon si Rodriguez upang makaiwas sa mga nabiktima nito kabilang na si Yolanda ng San Pedro St., Cabilang Baybay, Carmona, Cavite.

Si Yolanda na naging kapitbahay ni Rodriguez ay magsasadya at balak na humingi ng tulong kina CIDG Director Nestorio Gualberto at PNP Chief Director Leandro Mendoza na magsagawa ng masusing imbestigasyon sa misteryosong pagkawala ng akusado sa kamay ng mga awtoridad.

Nabatid na si Rodriguez ay nakatakdang dumalo sa pagdinig ng kanyang kaso kahapon sa sala ni RTC 4th Judicial Region Branch 37, Calamba City, Laguna at sa darating na Abril 23, 2002 sa Calamba MTC.