Ang biktima na kinilalang si Catherine Adduru, 25, ay nagtamo ng isang tama ng bala sa kaliwang sentido at namatay habang ginagamot sa Cagayan Valley Medical Center.
Nakilala naman ang suspek na boluntaryong sumuko sa Tuguegarao City Police Station na si PO2 Arnel Adduru, 32, miyembro ng nasabing istasyon ng pulisya.
Batay sa ulat na nakarating kahapon sa Camp Crame, naganap ang krimen dakong alas-8 ng gabi sa Soldiers Hills, Brgy. Caggay, Tuguegarao City.
Napag-alaman sa imbestigasyon na ikinagalit ng biktima ang pag-uwi ng suspek sa itinakda nitong dapat ay alas-7 ng gabi ay dapat nasa bahay na ito para magsalong silang mag-anak sa hapunan.
Katutuntong pa lamang umano ng paa ni Adduru sa bahay ay agad umano itong tinalakan ng biktima at upang makaiwas sa pagtatalo ay minabuti muna nitong maligo muna.
Ikinagalit ng biktima ang pagsasawalang kibo ng asawa at kinuha ang 45 service pistol ng kanyang asawa at tinutukan ito habang nagbibihis.
Sa puntong ito ay natakot ang suspek sa ginawa ng biktima kaya naman ay pilit na inagaw ang baril sa asawa at aksidente umano itong pumutok na tumama sa kaliwang sentido ng huli. (Ulat ni Joy Cantos)