Onsehan sa droga, pusher itinumba

DAET, Camarines Norte – Pinaniniwalaang onsehan sa droga ang dahilan upang pagsasaksakin hanggang sa mapatay ang isang lalaki ng kanyang dalawang kasamahan sa sindikato sa Brgy. Cobangbang ng bayang ito kamakalawa ng hapon.

Kinilala ng pulisya ang biktima na si Dennis Calleja, may sapat na gulang, samantala, tinutugis ngayon ng pulisya ang mga suspek na sina Epifanio Celino, Jr., 33, ng Purok 3 at isang nagngangalang Abe.

Sa nakalap na impormasyon ng pulisya, naganap ang krimen dakong alas-5 ng hapon habang nag-uusap ang biktima at dalawang nitong kasamang suspek sa naturang lugar.

Ayon sa pulisya, ang biktima ay kilalang tulak sa kanilang lugar at pinalalagay na may kaugnayan sa droga ang naganap na krimen. (Ulat ni Francis Elevado)