Trader nilikida sa loob ng trike

CAMP VICENTE LIM, Laguna – Pinagbabaril hanggang sa mapatay ang isang negosyanteng lalaki ng mga hindi kilalang armadong kalalakihan habang ang biktima ay nagpapahinga sa loob ng kanyang tricycle sa Barangay Caminawit, Occidental Mindoro kamakalawa ng hapon.

Ang biktima na idineklarang patay sa West Mindoro Hospital ay nakilalang si Juanito Lingcopenes, 45, tubong Taytay, Palawan ng Calderon St., Brgy. Labangan, San Jose, Occidental Mindoro.

Lumalabas sa inisyal na imbestigasyon ng pulisya, naganap ang pangyayari dakong ala-1 ng hapon sa loob ng Doctoleros Compd. ng nabanggit na lugar.

Nagsilbing look-out ang dalawang hindi kilalang lalaki habang ang isa pa ay pumasok sa nabanggit na compound at pinuntirya ang biktima.

Matapos matiyak na patay na ang biktima ay mabilis naman nagsitakas ang mga suspek sa hindi nabatid na direksyon. (Ulat ni Ed Amoroso)