'Linggo ng Bulacan' sinimulan na

MALOLOS, Bulacan – Sinimulan na kahapon ang pagdiriwang ng "Linggo ng Bulacan" at kaalinsabay nito ang paggunita sa ika-103 taong anibersaryo ng pagkakatatag ng unang Kongreso ng Pilipinas (The First Malolos Congress) na ginanap sa makasaysayang simbahan ng Barasoain sa nabanggit na bayan.

Libu-libong katao mula sa 24 bayan ang lumahok sa ginanap na parada na kinabibilangan ng mga manggagawa, mag-aaral at mga opisyal ng lokal na pamahalaan ng iba’t ibang munisipyo sa Bulacan.

Naging panauhing pandangal naman si Bulacan Gob. Josie dela Cruz at mga opisyal mula sa iba’t ibang tanggapan ng gobyerno.

Kabilang sa okasyong ginanap ay ang pagbubukas ng Agri-Aqua trade fair na inihandog sa "Araw ng Magsasaka at Mangingisda"; mga alay-lakad; balagtasan, pagbibigay ng award sa mga napiling Bulakenya; at ang pagkakaloob ng "Gawad Dangal Lipi.

Bubuksan din sa madla ang mga exhibit na ginawa ng mga residente ng Bulacan na naging tanyag na katulad nina Amado Hernandez at Atang dela Rama sa larangan ng pag-arte noong unang dekada.

Ang naturang okasyon ay tatagal ng anim na araw simula kahapon at magtatapos sa temang "Pangkabuhayang Lakas ng bawa’t Bulakenyo, Kaagapay sa Pagsulong ng Lahing Pilipino". (Ulat ni Efren Alcantara)