Pahinante hulog sa truck, patay

TALISAY, Camarines Norte – Isang pahinante ng Maesa’s Gravel and Sand Company ang iniulat na nasawi makaraang mahulog mula sa truck na kanyang sinasakyan habang nagbibihis ng damit kahapon ng umaga sa kahabaan ng tulay ng Talisay ng naturang lugar.

Kinilala ng pulisya ang biktima na si Larry Puhen, 22, may asawa ng Brgy. Calangcawan Norte, Vinzons, Camarines Norte.

Sa inisyal na imbestigasyon ni SPO1 Nonito Gonzales, may hawak ng kaso, nakasakay umano ang biktima sa ibabaw ng truck na may lulang graba habang bumabagtas sa kahabaan ng nabanggit na tulay.

Dahil sa may naunang isang tricycle sa truck na may plakang TPF-295 ay biglang kinabig ng driver na si Jessie Lopez pakaliwa ang minamanehong sasakyan.

Lingid sa kanya ay nagkataon namang nagbibihis ng damit ang biktima na naging sanhi upang ito ay mahulog sa kahabaan ng tulay bago masagasaan ng huling gulong ng nasabing truck. (Kuha ni Francis Elevado)