Ahente ng lupa pinatay ng kagawad

LUCENA CITY — Isang ginang na ahente ng lupa ang namatay makaraang barilin sa batok ng isang barangay kagawad habang ang biktima ay pababa sa kanyang jeep kamakalawa ng hapon sa Rosas st., Brgy. 8, sa lungsod na ito.

Kinilala ni Supt. Federico Terte, chief of police sa lungsod na ito ang biktimang si Gloria Ongose, 52, may asawa at residente ng Sitio Bagong Tulay, Brgy. Talipan, Pagbilao, Quezon, habang ang suspek na ngayon ay tinutugis ay kinilalang si Ronilo Ona, residente at kagawad ng Brgy. Ibabang Iyam.

Sa imbestigasyon ng pulisya, dakong alas-12:15 ng hapon ay pumunta ang biktima sa Brgy. 8 na lulan ng kanyang jeep.

Habang bumababa umano ang biktima sa sasakyan ay lumapit mula sa kanyang likuran ang suspek na armado ng isang kalibre 45 at walang sabi-sabing pinaputukan ang biktima.

May teorya ang mga imbestigador na atraso sa pagkakautang ang motibo ng krimen. (Ulat ni Tony Sandoval)