Nanunog ng 3 bahay timbog

DINALUPIHAN, Bataan – Dahil sa pagkalango sa alak ng isang 24-anyos na lalaki, napagtripang sunugin nito ang tatlong bahay kamakalawa ng hatinggabi sa Brgy. Pita ng bayang ito.

Ang suspek na ngayon ay nakapiit sa Dinalupihan PNP detention cell ay nakilalang si Dexter Valdez, binata, jobless ng naturang lugar.

Sa isinagawang imbestigasyon ng pulisya, naganap ang panununog dakong alas-12 ng hatinggabi habang natutulog ang mga may-aring sina Teresita Llave, Luzviminda Paguinto at Marilyn Miguel.

Walang iniulat na nasugatan o nasawi sa naganap na sunog dahil sa mabilis na pagresponde ng mga miyembro ng pamatay-sunog. (Ulat ni Jonie Capalaran)