2 estudyante patay sa frat war, 2 malubha

GEN. MARIANO ALVAREZ, Cavite – Dalawang kabataang lalaki ang iniulat na nasawi habang dalawa pa ang malubhang nasugatan makaraang magsagupa ang dalawang grupo ng fraternity kamakalawa ng gabi sa Brgy. Poblacion ng bayang ito.

Kinilala ng pulisya ang mga biktimang nasawi na sina Jessie Tapac, 20 at Rey Japon, 17 kapwa binata at residente ng nasabing brgy.

Ang mga malubhang nasugatan ay nakilalang sina Romeo Onate, 16 at Edgar Santos, 25, kapwa binata ng Brgy. Babuyan, Calamba, Laguna.

Dalawa sa mga suspek na ngayon ay nakapiit ay nakilalang sina James Mendoza, 19 at Bryan Balmores, 15 ng naturang brgy.

Ayon sa ulat ng pulisya, naganap ang sagupaan ng dalawang fraternity group dakong alas-10 ng gabi sa plaza ng naturang lugar habang ang mga ito ay nagkasalubong.

Nabatid sa imbestigasyon ng pulisya, na armado ng baril ang suspek nang maganap ang sagupaan. (Ulat ni Cristina Go-Timbang)