2 bangkay ng Japanese divers natagpuan na

Natagpuan na kamakalawa ng hapon ang dalawang bangkay ng Japanese national diving instructors makaraang mawala ang mga biktima habang nagtuturo sa mga estudyanteng Hapones noong Sabado sa karagatan ng Siquijor Island.

Kinilala ng pulisya ang mga biktima na sina Yoshimasa Shiotani, 48, may-ari ng diving shop sa Nara Prefecture, at si Megumi Kono, 28, babae, ng Suita, Osaka Prefecture, Japan.

Ayon sa ulat ng pulisya, si Ramon Moreno, isang Pinoy professional diver ang unang nakakita sa mga biktima may 80 metro sa ilalim ng nabanggit na karagatan.

Sa impormasyong nakalap mula sa pitong estudyanteng divers, ang mga biktima ay nagkaroon ng problema sa kagamitan sa paghinga habang ang mga ito ay sumisisid sa ilalim ng naturang karagatan bago mawala.

Kasalukuyang dinala ang mga bangkay ng biktima sa Dumaguete City malapit sa Isla ng Negros.