Hindi makayanan ang pagiging working student, nagbigti

BARAS, Rizal – Kalungkutan ang siyang nadama ng isang pamilya sa Pasko ng Pagkabuhay noong nakalipas na Linggo matapos na magpakamatay sa pamamagitan ng pagbibigti ang isang working student na siyang inaasahan nilang mag-aahon sa kanila sa hirap matapos na sumuko ito sa kanyang sitwasyong pinansiyal sa bayang ito, kahapon ng madaling araw.

Malamig nang bangkay na natagpuan ng kanyang inang si Maria Clara si Rimallo Sison Jr., binata, 2nd year student sa Guzman Institute of Technology ng Barangay Pinugay, Baras sa loob ng kuwarto dakong alas-3 ng madaling araw.

Isang lubid na itinali sa kisame ng bahay ang ginamit ni Rimallo sa pagpapakamatay.

Isang suicide note ang iniwan nito sa kanyang pamilya na nagsasaad ng ganito: " Mama, Ela, Jeffrey, Judeh, Patawad ".

Binanggit pa sa ulat na naging mahirap ang buhay ng biktima dahil sa pinagsasabay nito ang pag-aaral at ang pagtatrabaho upang suportahan ang kanyang ina at mga kapatid.

Maaari umanong hindi na nakayanan ni Rimallo ang bigat ng pananagutan na kanyang dala kaya napilitan na lamang itong kitlin ang kanyang buhay. (Ulat ni Danilo Garcia)