Pulis na nagpaputok ng baril noong New Year's Eve, kinasuhan

CAMP OLIVAS, Pampanga - Nahaharap ngayon sa kasong summary dismissal ang isang kagawad ng PNP matapos na ito ay napatunayang nagpaputok ng kanyang service firearm habang sumasabay sa putukan sa pagsalubong sa bagong taon noong Lunes na nagresulta sa pagkasugat ng isang sibilyan matapos tamaan ng ligaw na bala.

Sa ulat na isinumite ni Police Regional Office 3 (PRO3) director Chief Superintendent Roberto Calinisan sa Camp Crame, nakilala ang pulis na nagpaputok ng baril na si SPO1 Luis Vizconde, nakatalaga sa Cabanatuan-PNP at miyembro ng Criminal Investigation and Detection Group sa naturang lugar.

Ayon kay Calinisan, si Vizconde ay lumabag sa kautusan na itinatadhana ng pamunuan ng PNP na nagbabawal na magpaputok ng kanilang baril partikular na sa pagsalubong sa bagong taon.

Idinagdag pa sa ulat na si SPO1 Vizconde ay nagpaputok ng kanyang M-16 armalite rifle noong pagpasok ng bagong taon. Tinamaan ng ligaw na bala ang sibilyang si Leonardo Vicente, 26.

Ayon kay Calinisan, nagsampa na ng kasong summary dismissal proceedings ang tanggapan ng Central Luzon-PNP sa Camp Crame laban sa naturang pulis. (Ulat ni Jeff Tombado)