Lola, sinuwag ng motorsiklo, patay

TAYTAY, Rizal - Dahil sa walang nagmagandang-loob na tumulong sa pagtawid sa kalsada, isang 73-anyos na lola, ang iniulat na nasawi makaraang salpukin ng isang motorsiklong humahagibis, kamakalawa ang gabi sa bayang ito.

Idineklarang patay sa Ryan Anthony Hospital ang biktimang is Cecilla Apante ng Brgy. Dolores, Taytay, Rizal.

Samantala, kusang-loob naman sumuko sa pulisya ang driver ng motorsikong si Jeffrey Cruz, 21 ng No. 40 Rizal Avenue Brgy. San Isidro ng bayang ito.

Si Cruz na pinaniniwalaang nakainom ng alak ay driver ng motorsiklong Honda na may plakang PG4320.

Sa imbestigasyon ng pulisya, naganap ang pangyayari dakong alas 9:30 ng gabi sa kahabaan ng L. Wood St., sa Brgy. Dolores.

Hindi umano nakita ni Cruz ang biktima na tumatawid dahil sa madilim at walang anumang ilaw sa poste sa nasabing lugar. (Ulat ni Danilo Garcia)